Ministria e Punëve të Jashtme të Greqisë ka reaguar, pasi Gjykata e Vlorës la në burg kandidatin e koalicionit opozitar “Bashkë Fitojmë” për Himarën, Fredi Beleri.
Përmes një deklarate Ministria e Jashtme e cilëson vendimin e sotëm, si skandaloz nëse provat ndaj tij nuk janë të të pakundërshtueshme.
Më tej në deklaratë thuhet se ky vendim do të ndikojë edhe në marrëdhëniet e Shqipërisë me Bashkimin Evropian, duke shtuar se nuk tregon shtetin e së drejtës.
Deklarata e Ministrisë së Jashtme të Greqisë:
Vendimi i sotëm i gjykatës së Vlorës, nëse provat nuk janë të pakundërshtueshme, është skandaloz. Arrestimi i një kandidati për Kryetar Bashkie dy ditë para zgjedhjeve nuk përbën shtet ligjor. Vendimi për ndalimin e kandidatit për Kryetar Bashkie sjell një ndryshim të plotë të rregullave të barazisë në zgjedhjet bashkiake në Himarë, qendra më e rëndësishme e pakicës kombëtare greke në Shqipëri.
Një vendim i tillë do të ndikojë edhe në marrëdhëniet e Bashkimit Europian me Shqipërinë, pasi kusht i kësaj rruge europiane është respektimi i rregullave europiane dhe parimeve të shtetit të së drejtës nga vendet kandidate. Vendime si ky i sotmi që shkelin parimet e mësipërme do të thotë se në praktikë Shqipëria nuk po ndjek rrugën europiane
