Gjykata e Apelit, në Colmar të Francës, është mblidhur ditën e sotme për të shqyrtuar kërkesën e Serbisë për ekstradimin e Ramush Haradinajt, në Serbi.
Zëdhënësja e gjykatës, Sandra di Rosa, ka thënë se vendimi për liderin e AAK-së, ndoshta do të shtyhet, bazuar në vendimin e dhomës së hetuesve, deri në një seancë tjetër, transmeton Klan Kosova.
“Seanca e sotme do të adresojë përgjigjet e Ministrisë së Drejtësisë së Serbisë, në pyetjet e dërguara nga gjykata”, ka shpjeguar Di Rosa.
Kreu i Aleancës për Ardhmërinë e Kosovës, Ramush Haradinaj, u arrestua më 4 janar nga autoritetet franceze, bazuar në një fletëarrest të Serbisë të vitit 2004.
Gjykata franceze tashmë ka shtyrë dy herë vendimin për ish-kryeministrin e Kosovës. Ndërsa pritet si do të vendosë ditën e sotme.
