Është Franca gjysmëfinalistja e parë e Botërorit të Rusisë. Uruguai bëri sa mundi, por që nuk mjaftoi përballë “gjelave”, por edhe me një mungesë të madhe si ajo e Cavanit. Ishte një super Griezmann në fushë që u dha fitoren francezëve, me një asist dhe një supergol, por edhe i ndihmuar nga gabimi i Musleras.
Franca e nis ndeshjen në sulm dhe Uruguai përpiqet të përdorë taktikën e kundërsulmit. Sinjalin e parë e dha Mbappe me një goditje me kokë, por që kaloi mbi traversë. Nuk zgjati shumë dhe një goditje dënimi pranë zonës ekzekutohet nga Griezmann. Ky i fundit e hedh topin në zonën ku ndodhej Varane, e ky i fundit me një prekje të lehtë e çon në cepin e portës, atje ku Muslera nuk mund të arrinte dot.
Amerikanojugorët reagojnë pa u mbyllur pjesa e parë, ishte Caceres ai që bën një goditje fantastike me kokë, por Lloris ishte spektakolar dhe e ndalon topin pa kaluar vijën fatale. Sfera ka përfunduar në këmbët e Godin, i cili e ka dërguar topin jashtë një gjymsë metri larg portës.
Goditja përfundimtar për Uruguain ka ardhur në minutën e 62-të, kur portieri Muslera ka bërë një gabim të pafalshëm dhe i ka dhuruar golin e dytë Francës pas një gjuajtje qendrore të Antoine Griezmann. Një avantazh që mund të ishte trefishuar në minutën e 73-të, kur goditja e Tolisso ka kaluar pak sipër traversës.
Minutat e mbetura të takimit nuk kanë dhuruar më emocione, me Francën që ka arritur ta mbrojë pa probleme avantazhin dhe pa rrezikuar pothuajse në asnjë moment. Në gjysmëfinale, francezët do të përballen me fituesen e Brazil-Belgjikë, ndeshje që do të zhvillohet mbrëmjen e sotme, në orën 20:00.
