Qeveria franceze ka mbajtur qëndrim kritik ndaj referendumit, për rikthimin e dënimit me vdekje, në Turqi.
Një ditë pas fitores nga presidenti turk të forcimit të kompetencave të tij, presidenca franceze u shpreh në një deklaratë se organizimi i një referendumi për dënimin me vdekje, do të shfaqte dukshëm një shkëputje nga vlerat dhe angazhimet e marra prej Turqisë, në kuadër të Këshillit të Evropës.
“Vlerat dhe angazhimet e marra në kuadër të Këshillit të Evropës duhet të orientojnë autoritetet turke në fillimin e një dialogu të lirë e të sinqertë me të gjithë komponentët e jetës politike dhe shoqërore”, njoftoi Presidenca franceze.
Gjithashtu, në këtë deklaratë thuhet se Parisi merr në konsideratë shifrat zyrtare të shpallura pas referendumit të së dielës si dhe kontestimet e pretenduara, duke vënë në dukje se këto shifra e paraqesin shoqërinë turke të përçarë në lidhje me reformat e thella të parashikuara në vend.
