Francës dhe Danimarkës u ka mjaftuar një barazim mes tyre për të siguruar kalimin në fazën tjetër në këtë Botëror. Pas barazimit 0-0 do të jenë francezët koka e grupit me 7 pikë, ndërsa danezët kanë kapur vendin e dytë, ashtu siç ishte parashikuar.
Një ndeshje e qetë pa shumë impenjim nga të dyja skuadrat, ku tekniku francez, Deschamps kishte vendosur që të luante me lojtarët që kishte aktivizuar më pak. Danezët duket se ishin më të interesuar për fitoren dhe provuan disa herë me Eriksen, por mbrojtja e “gjelave” ishte mjaft e fortë.
Ndërsa në pjesën e dytë është Franca që sulmon dhe krijon shumë para portës së danezëve, por Giroud dhe Griezmann nuk janë të saktë për të finalizuar në rrjetë. Në të gjithë historinë e saj në Kupën e Botës, kjo është hera e parë që Danimarka ka barazuar 0-0.
Peruaj ka fituar ndeshjen e nderit ndaj Australisë me rezultatin 2-0. Ishte një fitore e merituar e peruanëve, të cilët kanë shfaqur një futboll tërheqës në këtë Botëror, dhe me pak fat dhe eksperiencë mund të kishin luftuar për një vend në 1/8-at.
Gjithsesi, ndeshja ndaj Australisë tregoi nivelin real të skuadrës ameriko-latine e cila do të largohet në shtëpi me një fitore që padyshim do të bëjë krenarë të gjithë popullin e Perusë. Shte sulmuesi i Watford Carillo ai që zhbllokoi rezultatin në minutën e 18’ falë një goli spektakolar.
Pas pushimit, legjenda Guerrero ka shënuar golin e qetësisë për peruanët të cilët e mbrojtën mirë rezultatin deri në fund të takimit. Një Australi zhgënjyese, e cila shënoi dy gola këtë turne, të dy nga pika e bardhë e penalltisë.
