Nuk është hera e parë që me reshjet e para të shiut, Tirana të përmbytet. Pamjet janë të frikshme, e ndërsa banorët janë frikësuar nëse situata mund të përkeqësohet më tej.
Tregtarët janë munduar që me çastin e parë të mblidhnin produktet që i kishin nxjerrë jashtë në shitje, duke shpëtuar çfarë të gjenin, e ndërsa shumë njerëz të papërgatitur për situatën, janë munduar që të gjenin një ambient lokali apo dyqani, për të “shpëtuar kokën”.
Mjafton një pikë shiu që ta shohim Tiranën si Venecia. Rrugë të mbushura me ujë, katet e para të ndërtesave të përmbytura, baltë e llucë ngado. Me pak fjalë, një situatë kaosi.
Jo vetëm kaq, por pusetat të jepnin përshtypjen sikur ishin kthyer në shatërvanë. Tirana mori një pamje tjetër vetëm në pak minuta shi, dukë vënë në rrezik bizneset dhe shtëpitë e banorëve të zonave të ndryshme.
Mesa duket, Tirana vijon të funksionojë me rrjetin e vjetër të kanalizimeve të ujërave. Po sikur reshjet të vijojnë me orë me radhë, çfarë pritet të ndodhë?
Pas situatave alarmante, mesa duket duhet të qëndrojmë në shtëpi, pasi rrjeti i kanalizimeve është i amortizuar.
TIRANA TODAY
