Ato çifti që kanë zgjedhur këto ditë për një udhëtim romantik në Venecia, duket se kanë bërë zgjedhjen e gabuar. Kjo pasi qyteti i dashurisë u përmbyt thuajse i tëri të hënën nga stuhitë e ashpra që sulmuan Italinë.
Shërbimet e transportit ujor u ndaluan në të gjithë Venecian, ndërsa 75% e qendrës së qytetit u përmbyt në 156 centimetra, niveli më i lartë që nga 2012-a.
Siç duket edhe në video, banorët dhe turistët po kalonin në Sheshin e Shën Markut me ujin që u shkonte deri në bel. Ndërsa kryetari i bashkisë urdhëroi evakuimin e zonës. Policia ndihmoi disa fëmijë, ndërsa turistët prisnin që të transportoheshin në një pikë më të lartë.
“E gjithë Venecia është në alarm të kodit të kuq për shkak të motit të keq. Gjendja është e përafërt me nivelet historike të përmbytjeve të vitit 1966”, tha presidenti rajonal Luca Zaia, raporton The Telegraph.
Matteo Salvini, ministër i Brendshëm, tha se autoritetet po kryejnë një monitorim 24-orësh për të gjitha zonat me rrezik të lartë përmbytjesh. Ndërkohë, kryeministri Conte mobilizoi autoritetet e mbrojtjes civile për të ndihmuar zyrtarët lokalë të Venecias./ TIRANA TODAY
