Edhe pse sot është festa e Pashkës, mediat në botë i kanë kushtuar një rëndësi të madhe fitores së referendumit kushtetues në Turqi.
Të shumtë janë kritikët e këtij referendumi. Dikush e quan “rikthim në diktaturë”, ndërsa një tjetër “mbyllje të historisë moderne”.
Madje, kishte edhe nga ato media që titullin kryesor kishin: “U prehtë në paqe Turqia”.
E tillë është edhe “Foreign Policy”, e cila ka publikuar një artikull të Steven A. Cook, sipas së cilit, pas këtij referendumi, Turqia ka marrë fund njëherë e mirë.
Sipas Cook, kur turqit votuan dje “Po”, ata po regjistronin kundërvënien e tyre ndaj versionit të modernitetit, që Ataturku përfytyronte dhe përfaqësonte.
“Foreign Policy” shkruan se kjo situatë pritet që ta destabilizojë politikën turke, edhe për shkak se kampi i atyre që votuan kundër, do të vazhdojë të bëjë rezistencë dhe kjo gjë do të shkaktojë vazhdimin e spastrimeve, që kanë nisur qysh me grushtin e dështuar të shtetit, vitin e kaluar.
Jo vetëm kaq, por ajo shkruan se Erdogani do të shembë republikën, për shkak se ai dhe njerëzit që ai përfaqëson, kanë vuajtur në duart e atyre që kanë udhëhequr dhe e kanë mbrojtur atë.
Pra, Erdogani thjesht po zëvendëson një formë autoritarizmi me një tjetër. Republika Turke gjithmonë ka mbartur aspiratën që do të bëhej një demokraci, por Turqia e re e Erdoganit e mbyll njëherë e mirë këtë mundësi.
