Një start që mund të përfundonte në tragjedi ajo që ndodhi në Çmimin e Madh të Belgjikës. Fernando Alonso me McLaren “fluturoi” mbi kokën e pilotit Charles Leclerc dhe ky i fundit rrezikoi jetën, por fatmirësisht nuk kishte dëme në njerëz. Gjithçka nisi pas një goditje të fortë nga pas që mori spanjolli nga Nico Hulkenberg me Renault, i cili nuk arriti të frenojë në kohë.
Dëmet që ka shkaktuar ky aksident janë me të vërtetë shumë të mëdha, pasi sipas spanjolles “AS” bëhet fjalë për 1.5 milionë euro. McLaren-i i Alonsos kërkon 500 000 euro për të qenë gati për Çmimin e Madh të Italisë, në fundjavë. Nga ana tjetër edhe Daniel Ricciardos i Red Bull pavarësisht se rezistoi disa xhiro, i ka shkaktuar makinës së tij një dëm prej 300 mijë euro, ndërsa dëmi i Renault kap shifrën e 354 mijë euro.
Shpenzime do të kenë edhe Mercedesi, Sauberi dhe Ferrari, respektivisht 190 560, 137 330 dhe 92 350 euro për rregullime të ndryshme në makinat e Valtteri Bottas, Leclerc dhe Kimi Raikkonen.
