“Na nevojitej fitorja dhe patëm gjithashtu një performancë të shkëlqyer. Po rikthehemi, dhe kemi akoma një rrugë të gjatë për të bërë, por është shumë e bukur ta mbyllim vitin në këtë mënyrë”, deklaroi mesfushori kampion bote i Manchester United, Paul Pogba, pas fitores së Manchester United me rezultatin 4-1 ndaj Bournemouth.
Pogba ishte protagonist absolut për të dytën ndeshje radhazi me një tjetër dygolësh, që në total bëjnë katër gola në tre ndeshje nën drejtimin e trajnerit të ri të “Djajve të Kuq”, Ole Gunnar Solskajer.
I ringjallur pikërisht nën drejtimin e norvegjezit, Pogba tregon për diferencat në lojë nga epoka e Mourinhos në këtë aktualen. “Ne jemi Manchester United dhe duhet të jemi në krye të kampionatit. Ky është thjeshtë një reagim i të gjithë futbollistëve dhe të gjithë po ndihen të kënaqur.
Është ndryshe, ne kemi fituar ndeshje edhe me trajnerin e mëparshëm, por është një tjetër stil loje, jemi më shumë ofensivë dhe po krijojmë më shumë raste për gol. Është pikërisht kështu që na pëlqen të luajmë. Unë dua të bëj gjithmonë e më shumë, por dua të luaj për skuadrën dhe të luaj thjeshtë”, deklaroi Pogba për “Sky Sports”.
