Flamurtari do të udhëtojë drejt Korçës për tu përballur me kryesuesit e Skënderbeut, shpresa e fundit për të mbajtur të hapur kampionatin. Do të jetë përballja e vendit të parë me të dytin, por edhe e dy skuadrave më në formë të Superiores. Herën e fundit që vlonjatët triumfojnë në Korçë ka ndodhur para shumë vitesh, kur Skënderbeu nuk ishte një ekip me kaq i konsoliduar. Në 8 vitet e fundit dy kanë qenë sukseset e kuqezinjve përballë “ujqërve të dëborës” një në 2010 dhe tjetri në Kupë në 2014, por kujtojmë që edhe Flamurtari ka pasur luhatje të mëdha forme në këto vite.
Ky mund të jetë sezoni i vlonjatëve nëse do të arrijnë të përballen me djemtë e Dajës, pasi janë një ekip i fortë dhe është investuar shumë për të arritur një sukses. Një fitore sot e Flamurtarit do të thotë që të mbahen të hapura shpresat për të luftuar për titullin kampion, pasi do të reduktohet diferenca e pikëve. Seria e rezultateve të fundit është më pozitive për ekipin e Duros, që gjithashtu do të rikthehet në një stadium të njohur për të, dhe pse jo për herë të parë.
Në Kupë si Flamurtari dhe Skënderbeu kanë ecur paralelisht, duke arritur suksese të rëndësishme ndaj Partizanit dhe Teutës, por përpara se të mendojnë për një përplasje hipotetike dhe për trofeun e Kupës, fillimisht do të hidhet vështrimi nga kampionati, i cili këtë të premte mund të hyjë në një tjetër rrjedhë. Fati kampionatit shqiptar do të vendoset në këtë përballje, pasi në rast triumfi të korçarëve atëherë do të “vriteshe” gara për titull.
