Finalja e Europe League po shihet si një udhëkryq që do të vendos fatin e Manchester United. Mediet shkruajnë se ekipi është në situatë të vështirë sa i përket të ardhurave, ndaj dhe humbja e ndeshjes do trondisë edhe më shumë financat
Një moment kyç, në udhëkryq.”
Kështu e përshkruan finalen e Europa League ndaj Tottenhamit ish-trajneri i parë i Manchester United, Rene Meulensteen, ndërsa klubi përgatitet për sfidën vendimtare të së mërkurës në Bilbao.
Si shumë tifozë të “Djajve të Kuq”, edhe tekniku holandez po përballet me realitetin e një sezoni katastrofik në Premier League – me United aktualisht në vendin e 16-të dhe të dënuar për një nga renditjet më të ulëta në më shumë se gjysmë shekulli.
Një fitore në Europa League do të ishte një dritë shprese, por nuk mund të mbulojë një sezon kaq të dështuar,” u shpreh Meulensteen për BBC Sport. “Nëse nuk e fitojnë, pse duhet të presim gjëra ndryshe sezonin tjetër? Pa këtë trofe, nuk ka Europë, nuk ka financa, dhe kjo më shqetëson vërtet për të ardhmen.”
Finalja merr peshë akoma më të madhe për shkak të mundësisë që fituesi të kualifikohet në Champions League, kompeticion që garanton përfitime të jashtëzakonshme financiare dhe imazhi.
Sipas ekspertit të financave të futbollit, Kieran Maguire, kjo është “ndeshja më e rëndësishme financiare në historinë e klubit”, duke theksuar se kualifikimi në Champions League mund të sjellë mbi 100 milionë paund nga të ardhurat e biletave, të drejtat televizive dhe bonuset nga sponsorët.
Nëse United shkon larg në garë, të ardhurat shtesë mund të kapin shifrën 30–40 milionë paund. Ndërkohë që përfitimet vlejnë edhe për Tottenhamin, situata financiare e United është më kritike: me një humbje prej 113 milionë paund vitin e kaluar, klubi është në një deficit total prej 300 milionë paund në tre vitet e fundit, pavarësisht të ardhurave kolosale prej 651 milionë paund në vitin 2023.
Gjithçka komplikohet nga borxhi mbi 1 miliard paund i trashëguar nga blerja me leverazh e familjes Glazer në vitin 2005 – një barrë që kushton dhjetëra miliona çdo vit për t’u shlyer dhe që pritet të rëndohet më tej nga interesat më të larta dhe rinegocimi i huave.
Në fakt, vetë klubi ka pranuar se është në rrezik të shkeljes së rregullave të qëndrueshmërisë financiare të Premier League, duke bërë finalen ndaj Tottenhamit një betejë që shkon përtej një trofeu – është lufta për mbijetesë në elitën e futbollit evropian.
