Tiranë – Gjatë Konkursit Ndërkombëtar për “Shtëpinë e Re të Fëmijëve & Kompleksin e Ri të Inspektorateve Shtetërore”, u vlerësua puna shumëvjeçare që ka çuar në ndërtimin e një sistemi modern inspektoratesh dhe në finalizimin e projektit për godinat e reja.
Drejtoresha e Investimeve, Elira Kokona, dhe Kryeministri Edi Rama përgëzuan kontributin 10-vjeçar të ish-kryeinspektorit Shkëlqim Hajdari, duke theksuar se ai e mori institucionin nga zero dhe e ngriti në nivele të krahasueshme me standardet evropiane. Sipas tyre, projekti i ri i inspektorateve është rezultat i një pune të gjatë dhe të qëndrueshme, për të cilën Hajdari ka punuar prej vitesh.
Reforma e inspektorateve u cilësua si një nga proceset më të rëndësishme të modernizimit të administratës shtetërore, e udhëhequr nga Shkëlqim Hajdari, ndërsa sot po konkretizohet edhe me ndërtimin e kompleksit të ri institucional.
Gazetarët rikujtojnë se një vit më parë, gjatë prezantimit të reformës së inspektorateve, Kryeministri Edi Rama deklaronte se Shkëlqim Hajdari ishte i vetmi drejtues që shkonte në zyrën e Kryeministrit për të kërkuar leje ndërtimi për shtetin, një detaj që u interpretua si tregues i korrektësisë institucionale dhe qasjes ligjore në administratën publike.
Finalizimi i këtij projekti shënon një hap të rëndësishëm në konsolidimin e reformës së inspektorateve dhe në përmirësimin e infrastrukturës shtetërore në funksion të shërbimeve publike.
