Filmi “Martesa” me skenar të Blerta Zeqirit është nominuar si kandidat për çmimin Filmi më i Mirë Oscar i Gjuhës së Huaj.
Në një intervistë për First Post, Zeqiri është shprehur se ky është filmi i parë kosovar me tematikë të LGBT-së. Drama e parë me një tematikë të tillë, në një komb të vogël, ka zgjuar interes të madh tek publiku.
Regjisorja e filmit, Blerta Zeqiri foli po ashtu për rëndësinë e tematikës, duke ngjallur interes për shkak të mentaliteti të popullit kosovar: “Anëtarët e komunitetit LGBT, edhe pse të mbrojtur nga ligjet e Kosovës, janë kërcënuar vazhdimisht, poshtëruar dhe sulmuar fizikisht, ndaj të cilëve shteti e bën njërin sy të verbër. Fshehja e identitetit të tyre mbetet e vetmja mënyrë për të mbijetuar në këtë mjedis, duke detyruar një numër të madh njerëzish homoseksualë të martohen me një partner të një seksi tjetër, gjë që kthehet në një dëm kolateral.”
Në filmin “Martesa”, ku partner është një grua tashmë e margjinalizuar dhe pa një zë në një shoqëri patriarkale.
Historia
Bekim dhe Anita po bëjnë përgatitjet për martesën e tyre. Bekimi më parë kishte një histori dashurie me Nolin, për të cilën Anita nuk kishte dijeni. Por, teksa çifti në prag të dasmës po bën përgatitjet e fundit, Noli kthehet sërish në jetën e Bekimit duke e bërë atë konfuz për martesën.
Gjërat komplikohen më shumë, teksa Anita mendon se Nolit i është thyer zemra nga një femër, madje e këshillon atë të luftojë për të dhe ta ndjekë.
“Doja që audienca t’i braktisë gjinitë e tre personazheve kryesore dhe të ndjente për ta këtë trekëndësh të ndërlikuar, ku asnjë vendim nuk është pa viktimë apo vuajtje”, shprehet Zeqiri.
Ajo shton se kishte frikë se si do e prisnin këtë film. Madje Zeqiri kishte bërë plane se si do të vepronte në rast se do të kishte reagime të ashpra, por fatmirësisht filmi u mirëprit.
Po ashtu, regjisorja tregon se fondi i qeverisë kosovare dhe asaj shqiptare ka ndihmuar në realizimin e këtij filmi, përndryshe ata nuk do të mund ta kishin sjellë atë për publikun e gjerë, tashmë një film i nominuar për çmimin Oscar./ TIRANA TODAY
