Filmi “Dita zë fill”, me skenar dhe regji të Gentian Koçit, është përzgjedhur si kandidatura zyrtare e Shqipërisë për “Oscar”, në kategorinë e “Filmit më të mirë të Huaj”.
Lajmi është bërë i ditur nga Qendra Kombëtare e Kinematografisë.
“Dita zë fill” pati premierën në Festivalin e Sarajevës, ku fitoi “Zemrën e Sarajevës” për aktoren më të mirë protagoniste, Ornela Kapetani.
Filmi ka pasur mjaft sukses, ndërsa tashmë drama psikologjike po shfaqet që prej të enjtes në kinematë e kryeqytetit.
Tema e këtij filmi është “lufta” e përditshme e një nënë të re dhe të vetme në Tiranën e ditëve tona, e cila gjendet në tallaze psikologjike që thyejnë njerëzoren brenda saj, si një rrugëdalje që i siguron foshnjës një vjeç strehë dhe ushqim.
