Falja e namazit në sheshet dhe xhamitë kryesore të qyteteve
Besimtarët myslimanë festojnë këtë të premte Kurban Bajramin.
Mijëra besimtarë u mblodhën në orët e para të mëngjesit në bulevardin “Dëshmorët e Kombit” për të falur namazin.
Kreu i Komunitetit Mysliman të Shqipërisë, Bujar Spahiu, tha se festën e Kurban Bajramit nuk duhet ta shikojmë si një ditë pushimi, por si një ditë që bashkon njerëzimin me njëri-tjetrin.
Në Durrës, falja e namazit u zhvillua në xhaminë e madhe të qytetit dhe në të gjitha institucionet e tjera të besimit islam.
Edhe në Fier, besimtarët u mblodhën në sheshin qendror të qytetit, ndërsa krerët e myftinisë kanë përcjellë urime dhe mesazhe për më shumë paqe dhe harmoni mes njerëzve.
Festime ka pasur edhe në qytetet e Lushnjes dhe Beratit.
Në Elbasan, besimtarët u mblodhën në sheshin kryesor të qytetit.
Në Shkodër, krerët e Komunitetit Mysliman janë ndalur tek të rinjtë.
Me mesazhe paqeje e harmonie për njëri-tjetrin, dhjetëra besimtarë myslimanë falën namazin në xhaminë e qytetit të Lezhës.
Edhe në qytetet e vogla të vendit, si Gjirokastra dhe Fushë Kruja, besimtarët festojnë sot Kurban Bajramin.
Kurban Bajrami është një nga dy festat më të mëdha të Islamit, që simbolizon sakrificën, mirësinë dhe përkushtimin ndaj Zotit. Besimtarët urojnë njëri-tjetrin për më shumë unitet në familje dhe për më shumë paqe për njerëzimin.
Simbol i kësaj dite është prerja e kurbanit, kryesisht qingji, si shenjë sakrifice. Një pjesë e tij u ndahet njerëzve në nevojë.
