Mijëra besimtarë myslimanë kanë falur mëngjesin e sotëm Namazin në sheshin “Skënderbej” me rastin e festës së Kurban Bajramit.
Falja u krye mëngjesin e ditës së sotme në orën 05:30. Ndërsa kjo është festa e dytë e këtij viti në kalendarin islam.
Pas faljes së mëngjesit, rituali vazhdon me prerjen e kurbanit dhe me vizitat familjaret dhe miqtë për të përcjellë urimet për njëri-tjetrit.
Kurban Bajrami është festa e cila lidhet me sakrificën e cila kryhet në emër të profetit Ibrahim, ndërsa vetë besimtarët myslimanë flijojnë edhe një kafshë si shenjë e sakrificës dhe devtoshmërisë.
Në ligjëratën përpara besimtarëve, Kryetari i Komunitetit Mysliman të Shqipërisë, Skënder Bruçaj tha se kjo është festa e flijimit, sakrificës dhe bindjes së njeriut për tu afruar në besim pranë Zotit. Ai i ftoi të gjithë besimtarët myslimanë të tregohen sa më bujarë duke u solidarizuar me njerëzit në nevojë.
“Në një ditë të tillë festë në të cilën atmosfera shpirtërore ndihet anembanë, dua t’ju përcjell urimet më të mira, qofshi të gëzuar e në paqe me të gjithë të dashurit e zemrës. Kurban Bajrami është simbol i sakrificës, sinqeritetit dhe dorëzimit të plotë tek Allahu i lartësuar. Besimtarët myslimanë shprehin devotshmërinë e tyre duke bërë kurban e duke u solidarizuar me fqinjët dhe njerëzit në nevojë. Në këtë ditë feste e gëzimi të Kurban Bajramit u bëj thirrje të gjithë besimtarëve vullnetmirë që të bëhemi falënderues për të gjitha mirësitë dhe begatitë qe i kemi dhuratë nga krijuesi ynë, dhe të tregohemi bujarë duke u solidarizuar me njerëzit në nevojë, me jetimët dhe me të gjithë ata që presin përkujdesin dhe vëmendjen tonë. Të jemi më mëshirues e tolerant, duke respektuar njeri-tjetrin dhe të lutemi që ditët e festës të vazhdojnë pa reshtur për të gjithë njerëzimin mbarë. Le të lutemi e të festojmë të bashkuar dhe të flasim vetëm një gjuhë, atë të dashurisë, falënderimit dhe ndihmës reciproke me synimin e fitimit te kënaqësisë së Zotit. Më lejoni t’ju uroj përzemërsisht të gjithë shqiptarëve brenda dhe jashtë vendit, Gëzuar Kurban Bajramin me lutjen që të shtohet mirëkuptimi, dashuria për njëri-tjetrin dhe të ketë paqe e mirësi në çdo fole familjare e shoqërore” shprehet ai.
Pas faljes pritet të japin mesazhet e tyre edhe drejtuesit e institucioneve shtetërore në vend, duke nisur nga presidenti i Republikës, Ilir Meta, i cili në orën 10:20 do jetë i pranishëm tek Komuniteti Mysliman për të uruar gjithë besimtarët për festën e Kurban Bajramit.
