Fqinjët e familjes Neziri dje panë tmerr me sy, ku banesa si dhe rrugica u lanë me gjak. Fqinjët kanë dëgjuar ulërimat dhe thirrjet e dy të moshuarve, Destan Neziri dhe Hasije Neziri, të cilët kishin dalë zvarrë nga banesa e tyre dhe kërkonin ndihmë.
Një lidhje e refuzuar nga të moshuarit, kërkesa për stabilizimin e gjëndjes ekonomike për të rinjtë, janë bërë “mollë sherri”. Pas arrestimit në Tiranë të 25-vjeçarit Hajri Neziri, në pyetje është marrë edhe bashkëjetuesja e tij, e cila ka rrëfyer se si u plagosën vjehrra dhe vjehrri i saj. Ajo ka thënë se vjehrra ishte e sertë, e fillimisht nisi të debatojë me të fejuarin duke i thënë se nuk punon. Sipas saj, vjehrra nuk e donte, pasi ishte nga Puka, raporton “Gazeta Shqiptare”.
“Po shikonim të katërt ndeshjen e radhës së kampionatit botëror. Ishim të qetë, nuk kishim sherre dhe asgjë. Vjehrra ime që është një grua e sertë, nisi të debatojë me të fejuarin tim, duke i thënë se nuk punon, se të dy ishim të papunë.
Ishte sherr i çastit. Unë u dashurova me djalin e saj, por ajo nuk me donte pasi unë jam nga Puka. Në sherr e sipër, Hajriu u përlesh me të ëmën dhe e goditi disa herë me thikë. Pastaj ndërhyri vjehrri që t’i ndante, por i fejuari im e goditi dhe atë me thikë”, është shprehur e reja.
Ndërkaq, ajo ka sqaruar se: “unë ndërhyra që t’i ndaja. Nuk mbaj mend më se çfarë ndodhi, por pashë se shtëpia u bë gjithë gjak. Dhe unë u bëra me gjak në krah dhe në fustan. Pastaj ikëm nga shtëpia se ishim terrorizuar. Të fejuarit tim i rridhte gjak nga dora, ndaj shkuam në Spitalin e Traumës në Tiranë. Shkaku i gjithë asaj që ndodhi ishte vjehrra ime”.
Ndërkaq, policia ka marrë në pyetje dhe 75-vjeçarin Destan Neziri. Ky i fundit ka deklaruar se: “Ndërhyra për të shpëtuar gruan nga djali”. Nga ana tjetër, i moshuari u ka thënë mjekëve të spitalit të Durrësit: “Aman, më shpëtoni gruan që e goditi im bir”!
