Pavarësisht se Milani po kalon një formë mjaft të mirë në fushën e lojës, që pasi Gatusso mori drejtimin, nuk mund të themi se e njëjta gjë po ndodh edhe jashtë saj. Lajmet e këqija këtë herë vijnë nga Kina, ku gjykata e Shenzen deklaroi zyrtarisht falimentimin e shoqërisë “Jie Ande”. Kjo shoqëri ishte edhe garancia dhe kasaforta e Yonghong Li, 48 vjeçar , pronar dhe President i Milanit.
Ka qenë Banka Kanton ajo që ka kërkuar shpalljen e falimentit të kompanisë kineze për një kërkesë likuidimi. Jie Ande ishte akredituar si një nga kompanitë më të rëndësishme dhe me më tepër likuiditet financiar mes atyre të përfshira në kurikulimin zyrtar të financierit kinez me rezidencë në Hong Kong.
Kjo goditje që kanë marrë bosët kinezë të Milanit me në krye Presidentin Li, ka ngritur pikëpyetje mbi aftësitë menaxhuese të tij për të përmbushur detyrimet ndaj kreditorëve. Për klubin është e rëndësishme të mbyllë bilancin në 30 qershor, ndërkohe për t’i dhënë vazhdimësi projektit Milan futet në lojë fondi Eliot, të cilit pronari kinez i klubit i ka borxh mbi 300 milionë euro.
Fondi amerikan Eliot ndërkohe do të ndihmojë Milanin duke i realizuar një rritje kapitali mes 30 dhe 40 milionë euro. Një veprim që kryhet në mënyrë që Milani të mos rrezikojë penalitete nga UEFA për të garantuar pjesëmarrjen e klubit në kompeticionet europiane. Natyrisht që nuk bëhet fjalë për një gjest bujarie, por për një llogari të pastër, pasi sanksionet eventuale të Uefas do të ulnin vlerën e Milanit duke e bërë më të rrezikuar kredinë e dhënë nga Eliot. Ky fond kurrsesi nuk ka si qëllim që të investojë tekl Milani. Në rast se klubi kalon në duart e tyre atëherë do të jetë sërish një fazë tranzicioni për Milanin, më e keqja mund të ndodhë që të shiten lojtarët dhe më pas të klubi, pasi fondi ka si synim që të nxjerrë borxhin e dhënë dhe fitime të tjera.
