F1, Vettel i sigurt: Ky do të jetë viti i “kokëkuqes”

Sebastian Vettel, 4 herë kampion bote në Formula 1, është shprehur i qartë se ky do të jetë viti i “kokëkuqes”. Ferrari për një dekadë nuk ka arritur të rrëmbejë një titull kampion si në pistë ashtu edhe për konstruktorë. Vettel këtë sezon që lamë pas e nisi në mënyrë mjaft të mirë, por disa gabime nga fundi e penalizuan atë të dështonte dhe titulli të shkonte në duart e Hamilton tek Mercedes. Në 20 shkurt skuderia italiane do të prezantojë edhe makinën me të cilët do të garojë këtë vit dhe Vettel është shprehur se gjithçka është në rrugën e duhur dhe me pak më shumë kujdes ky do të jetë viti i “kokëkuqes”.

Në një deklaratë për mediat, piloti gjerman tha: “Koha ecën dhe tashmë po afrohet koha e testeve të para dimëror, periudha ku hidhen bazat e sezonit të ri, ndaj për ne është e rëndësishme që të kemi një makinë të shpejtë që në start. Unë besoj se puna e bërë gjatë muajve të fundit është mjaft e mirë dhe se inxhinierët në fabrikë kanë gati makinën e re, që shpresoj të na japë shumë kënaqësi”. Vettel shprehet se mezi pret të nisë ky sezon i ri, për të bërë realitet ëndrrën e tij dhe për të përfunduar atë që la në mes vitin e kaluar. “Titulli është detyrim për të gjithë fansat. Unë shpresoj që këtë vit të mos ndalemi në mes të rrugës, por të luftojmë deri në fund për kampionatin”, tha Vettel.