Nga: Marsela Sinani
Çdo ditë zgjohem me makthin nëse do të jem në kohë për të shkuar në punë, nëse do të gjej një hapsirë të lirë për tu futur në autobus, e do të ishte ndër ditët më të mira po të zbatonin një orar të caktuar. Padiskutim që ka linja urbane ku orari zbatohet me përpikmëri, por ka edhe të tjera, këto më në masë, që të shkatërrojnë ditën, duke të lënë më shumë se 10 minuta në stacion.
Sapo ti bëhesh pjesë e masës në ambientet e autobusit, përballesh me kushte aspak higjenike. Njerëzit që shtyhen e ngjishen me njëri-tjetrin, sedilje të thyera. Kryqëzojmë gishtat kur është ditë e hënë, pasi qarkullon era parfum, ose kur fatorino është në humor, pasi për shkak të memories, ata të godasin sa herë të përballen me ty, për të kërkuar lekët.
Por nuk kam të ndalur me kaq, pasi tortura më e madhe gjatë stinës së verës është edhe kondicioneri, që në jo pak raste është kthyer në një moll sherri. Për të mos harruar, atë që cilësohet si qershia mbi tortë, hajdutët. Ata po që janë shtuar në masë, madje gjen edhe persona të cilët të ndihmojnë duke të paralajmëruar se kush është hajduti në një linjë të caktuar.
Jo më larg se një ditë më parë, “Tirana Today” ndau me të gjithë ndjekësit një video, ku qytetarët ziheshin për kondicionerin.
Në vende të tjera, ky është një absurditet, por ja që ne përballemi çdo ditë me këtë realitet të trishtë. Të dënohesh me erë, me mbipopullim, dhe të presësh autobusin për minuta të tëra. Ky është një dënim që na prek të gjithëve, ndonëse shumë është thënë dhe është premtuar. Të gjitha këto janë premtime boshe!
Një pyetje e ngremë padiskutim të gjithë: A e justifikon bileta që ne paguajmë, shërbimin e marrë? Pas rritjes së çmimit të biletës, Bashkia e Tiranës nisi monitorimin e zbatimit të kushteve të vendosura prej saj, për operatorët e transportit urban. E madje nga verifikimi në terren i inspektorëve të Agjencisë për Mbrojtjen e Konsumatorit, Bashkia e Tiranës morri një sërë masash administrative, për disa nga linjat që nuk respektuan kushtet.
Gjobat e vendosura nga inspektorët e Agjencisë për Mbrojtjen e Konsumatorit përfshinin: mosrespektim të frekuencave në stacionet e autobusëve, vonesa në lëvizjen e autobusëve, probleme me sistemet e ngrohjes të mjeteve, si dhe probleme të tjera që lidhen me dëmtime brenda mjeteve. Pas asaj periudhe, duket se askush nuk ka lëvizur gishtin, ndonëse jemi bërë për të qarë hallin.
Ky hall që na ka zënë, e që është i përbashkët, na detyron që edhe të shpërthejmë në rrjetet sociale. Është analisti i Çështjeve Ndërkombëtare, Ilir Kalemaj, i cili e trajton rastin, përmes një gjuhe ironike dhe tallëse. Ai bën një paralele me Estoninë, e cila bën transportin publik falas.
Disa vende si Franca dhe Gjermania, po mendojnë të përkrahin transportin publik falas, për të reduktuar trafikun dhe ajrin e ndotur. Por nëse plani i Estonisë rezulton i suksesshëm, ajo do të bëhet vendi i parë në botë me transportin publik falas.
Ja shqetësimi i ngritur nga z. Kalemaj në rrjetin social Facebook:
Logjikisht, transporti publik falas inkurajon njerëzit që të lënë makinat e tyre në shtëpi, duke lehtësuar kështu trafikun, dhe duke zvogëluar ndotjen e ajrit. Ehhh sa larg jemi ne nga kjo gjë…
Tirana Today
