Ish-deputeti Ervin Bushati është kandidat për ambasador i Shqipërisë në Shtetet e Bashkuara të Amerikës.
Posti i ambasadorit në SHBA është konsideruar si më i rëndësishmi nga të gjithë kandidatët për ambasadorë që paraqesin platformën e tyre sot në Komisionin e Kuvendit për Politikën e Jashtme.
Bushati ka vënë theksin te thellimi i marrëdhënieve mes Shqipërisë dhe aleatit strategjik SHBA. Ndryshe nga kandidatët e mëparshëm, Bushati nuk ka hasur në kritika të forta nga anëtarët e opozitës në këtë komision.
Deputeti Lavdrim Krashi, e ka pyetur Bushatin se cila do të jetë qasja e tij ndaj lobit të fuqishëm grek në SHBA.
“Lobi grek është shumë i fuqishëm. Kush do të jetë qasja juaj ndaj këtij lobi të fuqishëm. Në SHBA Shqipëria ka një diasporë të vjetër dhe të re shumë të madhe. A keni ju një plan për ruajten e gjuhës, kulturës, duke synuar diçka përtej marrëdhënies mes shtetit shqiptar dhe diasporës. Siguria energjitike pas fillimit të luftës në Ukrainë ka marrë rëndësi të madhe. Si mendoni ju që partneriteti strategjik të kthehet në një bashkëpunim dy palësh”, është shprehur Krashi.
Lidhur me këtë, Bushati tha:
“Ne vijmë nga udhëtime të njëjta, edhe unë kam punuar, studiuar, njësoj si ju. Ne shqiptarët kudo në botë përpiqemi të ruajmë traditën, të kemi atë etninë tonë. Lobimi ynë më i mirë është direkt administrata, shteti amerikan, duke mbajtur linjën direkte me ta. Si çdo vend në Europë edhe ne kemi komshinjtë tanë. Me fqinjët tanë jugorë, Grekët kemi një histori nga më paqësoret, po të shohësh përballjet e gjermanëve me Francën. Kemi popullata të përziera. Kemi një pjesë të madhe të emigrantëve. Ka dhe programe shumë të mira Ministria e Kulturës. Im gjysh ka qenë pjesë e diasporës, ka shkuar në Boston me Nolin”, u përgjigj Bushati.
