Telenovela Ergys Kaçe ka përfunduar, mesfushori i kombëtares shqiptare është larguar nga PAOK dhe i është bashkuar në formë huazimi në ditën e fundit të merkatos ekipit qipriot APOEL Nikosias. Edhe pse u fol që 23-vjeçari do të ishte pjesë e Panathinaikos, duket se ekipi i njohur i Qipros ka bërë hapa konkrete dhe ka bindur mesfushorin që në pjesën e dytë të sezonit të luaj atje. Sipas informacionit të mediave greke, Kaçe ka arritur marrëveshjen me APOEL dhe për këtë arsye ka udhëtuar sot drejt Qipros.
Trajneri grek, George Dona ka këmbëngulur që të ketë në ekip Ergys Kaçen. Natyrisht, kjo lëvizje është bërë për të pasur aktivizim, çka nuk e gëzonte te PAOK-u, sepse Kaçe dëshiron të vijojë të jetë pjesë e rëndësishme e kombëtares shqiptare. Kace ka luajtur 158 ndeshje me PAOK-un dhe ka shënuar 7 gola. Në kampionatin qipriot, APOEL është i dyti, me një pikë më pak se Apollon Limassol, pas 21 javëve kompeticion në zhvillim.
