Enea Lapa, djali sarandiot, pas tetë vitesh erdhi këto ditë nga Amerika në qytetin e zemrës për t’u çmallur nga afër me familjarët e njerëzit e tij të dashur.
Amerika i dha mundësinë Eneas të zhvillojë pasionin që i lindi atje për të bërë emër në një sport fare të veçantë, jiu-jitsu brazilian, ku ai ushtrohet dhe tashmë jep edhe mësim.
Jiu – jitsu brazilian, na thotë Enea, ngjason me xhudon, por ndryshon kaq shumë nga ajo, sa njihet si “arti xhentil apo i butë”.
E kishte njohur tetë vite më parë këtë lloj sporti në Sarandë, Enea, por nuk e kishte ushtruar më tej. Por tani që e ka bërë pjesë e jetës së tij.
Jiu -jitsu brazilian për sarandiotin Enea atje në Amerikë është sporti më i dashur për të.
Fillimi nuk ishte i lehtë, nis të tregojë Enea. Iu desh të stërvitet fort për të fituar teknikat. Pesë vite më parë, pra në vitin 2020, Enea Lapa do të bëhej emri i kampionit të botës në kategorinë e në peshën e tij, ndërsa në 2023 zuri vendin e dytë në klasifikimin panamerican.
Ngjitja ka qenë e pandalshme dhe sot ai koleksionon 15 medalje ari, shumë medalje argjendi e disa bronzi. E këto e kanë bërë të marrë jo pak vëmendje nga mediat vendase atje.
Pas gjithë këtyre arritjeve ëndrra më e afërt e Eneas, sarandiotit 35 vjeçar në Amerikë, është të krijojë një Akademi të vetën me jiu-jitsu brazilian dhe të kapë vendin e parë në kampionatin panamerikan, që përgatitet për këtë vit.
Por përveçse në Amerikë tek Enea zënë vend edhe projektet e tij jo të largëta për përhapjen e këtij sporti edhe në Sarandë. Pasi jiu-jitsu brazilian në vlerësimin e Eneas, përveçse një art luftarak, është edhe një mënyrë mbrojtjeje personale.
Jo më kot për jiu-jitsu brazilian thuhet se, nëse shikoni një njeri që di lëvizje të jiu-jitsu, këshillohet të mos i afroheni, sepse do përfundoni në spital, na tha Enea në intervistën e realizuar me të në ditët që ai ishte në Sarandë.
