Dy shtetas 25 dhe 38-vjeç të cilët ishin në kërkim, pasi akuzoheshin për disa vepra penale, tashmë janë vënë në prangat e policisë. Për shtetasin Eriger ( Gentian) Bushi, 38-vjeç, gjykata ka caktuar masën e sigurisë “Arrest me burg” për veprat penale “Mbajtje pa leje dhe prodhim i armëve, armëve shpërthyese dhe municioneve”, “Kanosja” dhe “Plagosje e lehtë me dashje”. Po kështu, Gjykata e Shkallës së Parë Kurbin ka caktuar masën e sigurisë “Arrest më burg” për veprat penale “Prodhimi dhe shitja e narkotikëve” kryer në bashkëpunim për shtetasin Bruno ( Maks) Cenaj, 25-vjeç.
Nga forcat policore të Komisariatit të Policisë Kurbin është bërë i mundur lokalizimi dhe kapja e shtetasit në kërkim Eriger Bushi, 38-vjeç, banues në Laç (person me precedentë të mëparshëm penale, i dënuar më parë për armëmbajtje pa leje, plagosje, kundërshtim i punonjësve të policisë, si dhe i dyshuar për vjedhje me dhunë)
Për këtë shtetas, Gjykata e Shkallës së Parë Kurbin, me vendimin nr.1188 datë 31.05.2018, ka caktuar masën e sigurisë “Arrest me burg” për veprat penale “Mbajtje pa leje dhe prodhim i armëve, armëve shpërthyese dhe municioneve”, “Kanosja” dhe “Plagosje e lehtë me dashje”.
Po kështu, nga forcat policore të Seksionit Kundër Narkotikëve në Drejtorinë Vendore të Policisë Lezhë është bërë i mundur kapja e shtetasit në kërkim Bruno Cenaj, 25-vjeç, banues në Kukës.
Gjykata e Shkallës së Parë Kurbin me vendimin nr. 1254 datë 06.06.2018, ka caktuar masën e sigurisë “Arrest më burg” për veprat penale “Prodhimi dhe shitja e narkotikëve”, kryer në bashkëpunim.
Materialet procedurale për të dyja rastet u referuan Prokurorisë pranë Gjykatës së Shkallës Parë Kurbin, për veprime të mëtejshme.
