PSG do të presë ditën e nesërme në ‘Parc des Princes’ , gjiigandin gjerman Bayern Munich i cili ka në krye të pankinës një ish trajner të parisienëve italianin Carlo Ancelotti. Kjo e bën më të vështirë sfidën për Emery, pasi italiani e njeh mirë organikën e ekipit të tij.
Trajneri i Psg, Unai Emery ka folur për mediat në prag të sfidës së vlefshme për fazën e grupeve të UEFA Champions League, kundër Bayern Munich. I paevitueshëm rikthimi te diskutimi në lidhje me atë që do të ekzekutojë penalltitë te ekipi parisien, mes Cavani dhe Neymar. “Kemi shumë futbollistë të gatshëm të ekzekutojnë penalltitë dhe që kanë dëshirë t’i gjujnë ato. Do të përpiqemi të fitojmë sa më shumë penallti në mënyrë që të dy futbollistët të mund të kenë mundësinë që të ekzekutojnë. Kam komunikuar me ata për të sqaruar se si duhet të shkojnë gjërat në fushë, gjithashtu edhe në lidhje me penalltitë”, deklaroi trajneri Emery.
Kreu i pankinës parisiene më pas u përqendrua te skuadra që aktualisht drejtohet nga ish-trajneri i PSG, Carlo Ancelotti: “Është një skuadër e madhe, me histori dhe që dëshiron të fitojë Champions League. Janë ndeshjet që duam të luajmë”. Emery njofton gjithashtu edhe lajmin e mirë për rekuperimin e Neymar, pas mungesës në kampionat, duke iu përgjigjur gjithashtu kritikëve të PSG, për fushatën e blerjeve: “Neymar është gati të luajë. Në aspektin sportive kemi shumë armiq, sepse shohin që kemi kampionë të mëdhenj në ekip, gjithashtu edhe për faktin se jemi kandidatë për të fituar trofeun e Champions League”.
