Në ekspozitën “Breza në artet figurative”, vijnë të ndërthurura e reja dhe tradita, në këto ditë dhjetori për publikun në sallën e ekspozitave të Muzeut Historik Kombëtar.
Në këtë edicion të tretë kjo ekspozitë përmban 81 punime nga 31 artistëve të njohur si, Fadil Pëllumbi, Guri Madhi, Aristotel Papa, Sali Shijaku, Lec Shkreli, Shaban Hysa, Kujtim Buza, Rexhep Aliaj, Agim Faja, Kleo Nini, Minella Tanellari, Robert Permeti, Idriz Balani, Leka Rudha e shumë të tjerë, shkruan ata.
Piktori dhe kuratori i kësaj ekspozite Robert Përmeti, tha se ,”këto punë prezantohen për herë të parë dhe piktorët prezantohen me kompozime, peizazhe, portrete. Qëllimi është jo vetëm të tregojnë punimet në pikturë, por dhe të bëhen bashkë në një ekspozitë për të sjellë tek publiku të renë dhe traditën. Mes autorëve në ekspozitë janë dhe nga ata që nuk jetojnë më, por shumë të vlerësuar me krijimtarinë e tyre në pikturë’, ‘u shpreh ai.
Mesazhi për këtë ekspozitë, sipas Përmetit, është ”arti ecën dhe artistët ecin mbi supet e njëri tjetrit. Brezat linden për shkak të trashëgimisë. Në art ne trashëgojmë një kontingjent të mirë që janë brilante të autorëve në të kaluarën, duke nisur dhe nga ata që kanë qenë më parë, por dhe tek emrat sot si Sali Shjaku. Ia vlen që ne ta shfrytëzojmë si mesazh që e kaluara, e tashmja dhe e ardhmja ndërtohen mbi bazë duke reflektuar të kaluarën, pra si një bashkësi unike”, u shpreh ai.
Ekspozita vjen dhe këtë vit në muajin e fundit të vitit, duke u bërë pjesë e jetës artistike e publikut artdashës kryeqytetas që në këtë ekspozitë do të krijoje idenë dhe do të marrë mesazhin se arti ecën mbi bazë trashëgimie.
