Rënia e qeverisë në Kosovë dëmton projektet kapitale. Siç dihet të martën 78 deputet të Kuvendit të Kosovës, kanë votuar për mocionin të iniciuar nga opozita, çka ka rezultuar me rënien e Qeverisë se Kosovës, të drejtuar nga kryeministri në largim, Isa Mustafa.
Sipas ekspertëve, rënia e qeverisë në Kosovë mund të ketë ndikime në dinamikën e realizimit dhe zhvillimit të disa projekteve ekonomike në vend. Dhe se ndërrimi i shpeshtë i qeverive po e ngadalëson realizimin e projekteve.
Projektet të cilët ka qeveria në proces, janë ndërtimi i termocentralit, “Kosova e Re”, pastaj rivitalizimi i Kombinati “Trepça” dhe projekti Zonës Turistike në Brezovicë.
Agim Shahini, kryetar i Aleancës Kosovare të Biznesit, thotë se edhe pas rënies se qeverisë, administrata shtetërore është dashur të funksionojë, por në Kosovë thotë ai, është bërë praktikë që deri në formimin e Qeverisë se re, projektet kapitale të pezullohen ose të rinisin nga zeroja.
“Përderisa në Kosovë dhe në Ballkan të gjitha projektet janë të lidhura më politikë, do të ngadalësohet ritmi i tyre deri sa të formohet Qeveria e re, dhe Qeveria e re do të ketë prioritet që ato projekte të nisura të përfundojnë, nëse nuk fillojë edhe njëherë të gjitha nga zeroja”, ka thënë Shahini.
Berim Ramosaj, profesor në Universitetin e Prishtinës, ka thënë se projektet kapitale ndikohen nga rënia e Qeverisë, por dëmet nuk janë më të mëdha se sa nevoja për ndryshime qeverisëse. Sipas tij, Qeveria tashmë në largim, edhe ashtu nuk ka qenë në gjendje që të marrë vendime të rëndësishme.
Edhe ish-kryetari i Odës Ekonomike të Kosovës, Ismail Kastrati, thotë se Qeveria nuk ka pasur fuqi që të shtyjë përpara projektet kapitale.
“Varet sa do të zgjasë procedura rreth zgjedhjeve, sa shpjet do të formohet Qeveria dhe sigurisht se duhet të fillojë dinamika e realizimit të projekteve. Kjo Qeveri, kohëve të fundit u pa se nuk kishte fuqi, që të shtyjë proceset përpara dhe të marrë vendime të rëndësishme”.
Ndryshe, pothuajse asnjëra legjislaturë në Kosovë nuk ka arritur të përfundojë mandatin kushtetues katër vjeçar, çka ka ndikuar që vendi të shkojë në vazhdimësi në zgjedhje të parakohshme. Vlerësohet se për një palë zgjedhje në Kosovë, kosto financiare shkon deri në 10 milionë euro.
Vlen të thuhet se Komisioni Qendror Zgjedhor në Kosovë, ka publikuar dokumentin rreth zgjedhjeve që do të mbahen më 11 qershor, sipas këtij dokumenti, fushata parazgjedhore fillon më 31maj dhe përfundon më 9 qershor. Radio Evropa e Lirë.
