Shënohet sot 18-vjetori i asaj që njihet si “Dita e Eksodit”, kur qyteti i Kukësit hapi dyert për qindra mijëra shqiptarë të Kosovës, të cilët iu larguan luftës.
Lufta nisi më 28 shkurt të vitit 1998, si pasojë e betejës së zhvilluar midis ushtarëve të Ushtrisë Çlirimtare të Kosovës dhe forcave serbe, ku mbetën të vrarë disa policë serbë. Në shenjë hakmarrjeje, forcat serbe rrethuan fshatrat Likoshan e Qirez, ku edhe u ekzekutuan 24 civilë.
Kjo njihet si masakra e parë që iu bë civilëve shqiptarë nga forcat serbe në Kosovë.
Kështu, u dëbuan mbi 800 mijë shqiptarë, të cilët qëndruan në Has e Kukës të Shqipërisë, apo në Maqedoni e Mal të Zi. Gjithashtu, u vranë 15 mijë persona, nga të cilët 2.400 luftëtarë të UÇK-së e të tjerët civilë, si dhe u dhunuan seksualisht nga ushtarët serbë mbi 20 mijë vajza e gra shqiptare.
5 mijë njerëz janë zhdukur gjatë luftës, fati i shumicës prej tyre është zbardhur deri në 2007-ën, por ende shumë prej tyre vijojnë të kërkohen nga të afërmit.
Artileria e rendë serbe shkatërroi dhe dogji rreth 1.100 vendbanime shqiptare, plaçkiti, dogji e shkatërroi mbi 200 mijë shtëpi, banesa, lokale, biznese, punishte zejtarie, fabrika, shkolla, biblioteka, monumente kulturore-historike, objekte kulturore, shkencore, fetare etj.
Sulmet dhe gjenocidi serb ndaj shqiptarëve u ndalën më 23 mars 1999, me ndërhyrjen e NATO-s, e cila detyroi forcat serbe dhe Sllobodan Millosheviçin, të nënshkruajë kapitullimin në Kumanovë, më 10 qershor 1999.
