Romela Begaj shkëlqeu në Botërorin e Anahajmit në Kaliforni, duke fituar titullin në shkëputje, ndërsa doli nënkampione në dygarësh. Ky ishte dhe rezultati më i mirë i marrë ndonjëherë nga një peshëngritës kuqezi.
Por pak ditë më parë vjen edhe pezullimi i Romela Begajt nga Federata Botërore e Peshëngritjes pasi rezultoi pozitive me doping. Ajo dyshohet se ka përdorur një nga barbat e ndaluara të tipit “Stanozololi”, i cili është ndaluar të përdoret nga sportistët që nga viti 1974 nga Komiteti Olimpik Ndërkombëtar (CIO).
Kjo substancë është sintetike dhe përdoret kryesisht për kurimin e anemisë, si dhe disa sëmundjeve të tjera. Po ashtu ndihmon në rritjen e masës muskulore, shtimin e rruazave të kuqe në gjak dhe forcimin e kockave. Ky lloj dopingu nuk është një risi në botën e sportit, pasi në të kaluarën shumë sportistë kanë paguar pasojat e përdorimit të tij, duke përdorur substancën e “stanozololit”.
Presidenti i Peshëngritjes, Elez Gjoza, i kontaktuar nga Tirana Today, është shprehur se: “Këtu nuk ka vend për të folur për akuza dhe për ta bërë fakt të kryer që Romela Begaj është diagnostikuar si përdoruese e dopingut, është thjeshtë një konstatim që duhet vërtetuar. Dhe ne jemi 100% të sigurt që ajo është e pastër. Për të vërtetuar këtë ne do të presim rezultatet e analizave më të avancuara të “Testit B”, u shpreh Gjoza.
Ndërsa pyetjes që ky rast është i përsëritur në peshëngritjen shqiptare, mos ndoshta vjen nga regjimi i ushqimit që përdoret, Gjoza u përgjigj: “Nuk kam asnjë koment, duhet të presim përgjigjen e analizave dhe atëherë mund të flasim për më gjatë. E përsëris që Romela Begaj është e pastër për ne dhe kjo do të vërtetohet shumë shpejt.”
Trajneri i peshëngritëses, njëkohësisht dhe burri i saj ka hedhur poshtë këto analiza dhe është shprehur se janë të gatshëm për të bërë “testin B”. Kjo është një lojë e pistë që po bëhet për të favorizuar amerikanen e cila e mbylli garën në vendin e tretë.
TIRANA TODAY
