Ekskluzive/Koreani i Partizanit bën “lëmsh” mediat; Klubi: Verifikoni lajmet

Partizani është duke marrë në provë shumë lojtarë për të zëvendësuar vendet e të larguar në merkaton e janarit apo edhe më parë. Të martën në stërvitje kanë dalë dy lojtarë të rinj, ku njëri prej tyre ishte koreano-jugorë. Xhin-Hjun Li, mesfushor nga Korea e Jugut, i cili është vetëm 20 vjeç krijoi një lëmsh të madh, pasi mediat e ngatërrojnë me lojtarin e Austrisë së Vienës. Ky version është hedhur poshtë nga burimet nga klubi i Partizanit, të kontaktuar nga Tirana Today.

“Ka qenë një keqkuptim i madh, pasi klubi i Partizanit nuk ka dhënë asnjë shpjegim se kush është ai lojtarë dhe nga vjen. Gazetarët e pranishëm në qendrën stërvitore kanë kërkuar listën e lojtarëve që do të dilnin në stërvitje dhe iu kemi paraqitur, por nuk kanë kërkuar më shumë informacion. Më pas bëjnë një kërkim në “Wikipedia” dhe emri është i njëjtë me lojtarin që luan tek Austria e Vienës. Është gabim i madh që lajmet përhapen me kaq shpejtësi dhe askush nuk kërkon një sqarim apo të verifikojë lajmin, pasi kjo fjalë nuk ka dalë nga klubi,” u shpreh burimi pranë klubit për Tirana Today.

Partizani do ta shfrytëzojë merkaton e janarit deri në ditën e fundit për të afruar sa më shumë lojtarë cilësorë. Bie në sy fakti që janë duke afruar lojtarë të një moshe të re. TIRANA TODAY