Në politikën shqiptare, spektakli nuk njeh kufij. Këtë herë, protagonist është kryebashkiaku Erion Veliaj, i cili nga qelia e Durrësit vendosi të hidhte një firmë që do të trondiste “për gati 24 orë” ekuilibrat e pushtetit vendor. Me një lëvizje të guximshme, ai delegoi detyrat e tij si kryebashkiak te Sara Goxhaj, duke e çuar Anuela Ristanin në “rezervë”.
Ky akt, që u interpretua si një kundërgoditje ndaj kryeministrit Rama dhe një përpjekje për të vendosur kufij mbi ndikimin e tij absolut në shkelje të ligjit mbi Bashkinë e Tiranës. Kreu i qeverisë, sapo Veliaj përfundoi në qeli, e trajtoi Bashkinë e Tiranës si një plaçkë lufte të marrë me forcë. Vizitat e shpeshta në zyrat e bashkisë në errësirë, larg syrit të publikut ishin një shenjë se ai donte ta kishte nën kontroll bashkinë e Tiranës. Por plani i Veliajt përfundoi më shpejt se një telenovelë turke në orët e vona të natës. Veliaj u shpreh dje se delegimi i detyrave të kryebashkiakut, të cilin ai ia caktoi së fundi Sara Goxhajt, është rikthyer te nënkryetarja Anuela Ristani, pasi siç ai shton, duke qenë në kushtet e izolimit nuk kishte informacion që kjo lëvizje nuk ishte dakordësuar brenda ekipit drejtues
Me një komunikim që përziente justifikimin me mallin e pafund për shefin, ai shpalli se marrëdhënia e tij me Ramën nuk do të tronditej nga asnjë kohë, sado e “mallkuar” të ishte ajo. “U informova që paska plasur peshku në moçalet mediatike për përplasjen time me Ramën, për punë delegimesh. E para njëherë, me Ramën kam vetëm mall të takohem për të folur për punët si gjithmonë dhe asgjë tjetër s’më shkon në mendje. Kërkoni e gërmoni ku të doni tani, se u bë sport ky falë edhe prokurorit tim të dashur, por në marrëdhënien time me Ramën lodheni kot fare fare, se është plazmuar në kohëra të vjetra dhe nuk e ndryshon dot asnjë kohë, sado e mallkuar qoftë”, shkruante ai në një mesazh të gjatë, ku tingëllonte si një protagonist i një drame politike të epokave të mëdha.
Në këtë situatë, Veliaj e justifikoi vendimin e tij si një keqkuptim burokratik, duke pranuar se kishte menduar se ridelegimi i kompetencave te Sara Goxhaj ishte dakordësuar brenda ekipit. Në mungesë të informacionit të plotë për shkak të izolimit të tij, ai më pas vendosi ta tërhiqte vendimin, duke e rikthyer detyrën te Anuela Ristani. “Kam firmosur një ridelegim me idenë e gabuar se ishte dakordësuar brenda ekipit drejtues, por kështu është kur ‘punon’ pa informacionin e mjaftueshëm. Delegimi është rikthyer aty ku ishte dhe këtu mbyllet edhe keqkuptimi”, përfundoi ai, duke vulosur me dorën e vet kapitullimin e kësaj lëvizjeje të shkurtër, por të bujshme.
Qëndrimi i opozitës
Lidhur me zhvillimet në Bashkinë e Tiranës, dje reagoi dhe opozita. Sipas Belind Këlliçit, kryebashkiaku Veliaj pavarësisht tentativave për të rimarrë kontrollin e Bashkisë Tiranë nga duart e Ramës, u dorëzua përballë kërcënimeve të këtij të fundit për ta shkarkuar nga detyra. “Kjo tentativë për të emëruar këtë person, Sara Goxhajn, ka rreth 2 javë që po zhvillohet në bashki, për shkak të luftës së nisur nga Anuela Ristani kundër njerëzve të Veliajt në Bashkinë e Tiranës me urdhër të Ramës. Sapo e ka mësuar Rama, në mbrëmje ka shkuar në bashki, ku e ka thirrur Goxhajn dhe Dokushin dhe i ka komunikuar shkarkimin e menjëhershëm. Në dijeninë time, e ka përzënë në mënyrë demonstrative nga zyra e takimit, duke i dhënë urdhër Policisë së Shtetit që nga dita e sotme as zonja në fjalë e as Dokushi s’lejohen të futen në bashki dhe ka komanduar Jonida Halilin.
Të njëjtën kundërpërgjigje ka kthyer Veliaj me Policinë Bashkiake për të mos lejuar Halilin të futet në bashki, të besuarës së Ramës. Trimëria që zgjati vetëm 10 orë për t’i dalë përballë Ramës dhe për ta vënë me shpatulla pas murit Edi Ramën, që i detyruar pas refuzimit të Veliajt për të revokuar vendimin e komandimit të mëparshëm, do ta shkarkonte ditën e sotme. Do mbërrinte Rama për të komunikuar lajmin e shkarkimit të kreut të 5D, të Bashkisë Erion Veliaj. Veliaj, para këtij paralajmërimi dhe vetëm para 20 minutash, është dorëzuar. Është keqkuptuar, është tërhequr nga veprimi i tij. Trimëria e Veliajt zgjati 8 orë, para kërcënimit të hapur të Edi Ramës se sot Veliaj do shkarkohej si kryetar bashkie, tagër që e ka kryeministri. Kjo përplasje prej 2 javësh, flagrante, nuk fshihen më palët. Veliaj qëndron përballë Ramës dhe e ka kuptuar që Rama është redaktori e regjisori për atë që i ka ndodhur Veliajt. Me këto që kanë ndodhur dhe me pagesën 5D para dy ditësh, që pronari veç Veliajt është edhe Rama. Gjithçka ka ndodhur në bashki, ka ndodhur me urdhër të Ramës. Është ideuar nga kreu i organizatës, Edi Rama”, tha Këlliçi.
