Gigi Buffon është në fundin e karrierës së tij dhe shumë shpejt pritet që të japë lamtumirën nga futbolli i luajtur. Por situata duket se është mjaft e tensionuar dhe nuk do të ndodhë ashtu si ishte programuar. Buffon pritet që ndeshjen e fundit ta luaj kundër Veronës më 20 maj dhe më pas të varë këpucët në gozhdë, e jo ta mbyllë me kombëtaren “axurre” si ishte programuar.
Ky lajm është botuar nga “Corriere dello Sport”, sipas së cilës, Gigi po mendon të tërhiqet nga mundësia për t’u grumbulluar për herë të fundit nga Kombëtarja, e në këtë mënyrë edhe nga festa e organizuar për të nga Federata italiane e Futbollit (FIGC) në “Allianz Stadium” më 4 qershor, kur do të luhet miqësorja Itali-Holandë.
Do të ishte padyshim një fund i hidhur për një legjendë si Gigi Buffon, i cili është edhe portieri më i mirë italian i të gjitha kohërave, ai ka luajtur 200 ndeshje me Italinë, ku 80 prej tyre si kapiten. Një plagë e hapur kjo edhe nga polemikat e lindura muajt e fundit, kur Gigi duket se është dorëzuar nga kritikat e panumërta, në shenjë mosmiratimi të grumbullimit të tij në miqësoret ndaj Argjentinës dhe Anglisë.
Numri një i Italisë u mbrojt duke thënë se “jam këtu me entuziazëm e dëshirë, nuk do të kisha ardhur thjesht për shëtitje. Jam 40 vjeç, por gjithmonë mbetem portier i Juventusit, që nuk është një ekip i kategorisë së pestë”. Ai luajti vetëm ndaj Argjentinës, e më pas i la vendin Donnarummës në ndeshjen me Anglinë.
