E “tradhton” trupi, kapiteni i Arsenalit vendos të tërhiqet nga futbolli

Per Mertesacker ndjehet i lodhur dhe është shprehur se trupi e ka “tradhtuar” e nuk mundet më që të japë atë që duhet në fushën e lojës. Për këtë arsye ai ka vendosur që në fundin e sezonit të tërhiqet nga futbolli. Ka qenë vetë 33-vjeçari që ka konfirmuar se do të pensionohet, por do të vazhdojë të jetë pjesë e Arsenalit.

Mertesacker do të jetë pjesë e stafit tashmë, por e Akademisë së të rinjve të “topçinjve” në rolin e trjnerit gjë që do t’ia mundësojë “që të jetojë sërish i lirë”. Mbrojtësi gjerman, i cili e ngriti Kupën e Botës në vitin 2014, ka regjistruar vetëm 12 paraqitje për Topçinjtë në dy sezonet e fundit. Loja e tij e fundit ishte në muajin janar, kundër Nottingham Forest në Kupën FA.

Kapiteni i Arsenalit ka pranuar se niveli i lartë i lojës është shndërruar në një barrë të papërballueshme për trupin e tij të plakur. “Trupi im ka mbaruar. Të gjithë më thonë se duhet ta shijoj vitin e fundit, të luaj sa më shumë që është e mundur dhe të jap gjithçka. Më mirë do të qëndroja ulur në bankë ose akoma më mirë në tribuna, dhe pastaj, për herë të parë në jetën time, në një moshë mbi 30 vjeçare, di të ndihesha i lirë.”

“Nganjëherë e kupton se gjithçka është një barrë, si fizikisht ashtu edhe mendërisht, mirëpo duhet të vazhdosh pa kurrfarë dyshimi, edhe nëse je i lënduar. Në momentet para se të fillojë një ndeshje, stomaku më rrotullohet dhe më duket sikur dua të vjell. Pastaj më zihet fryma aq shumë saqë më dalin sytë lot”, ka deklaruar Mertesacker për Der Spiegel. Mbrojtësi gjerman e ka fituar tri herë Kupën FA dhe dy herë atë Community Shield, gjatë qëndrimit shtatëvjeçar te Arsenali.