Kërcënime të shumta kanë ardhur ditët e fundit në drejtim të Xherdan Shaqirit i cili do të udhëtojë drejt Beogradit më 6 nëntor për tu përballur me skuadrën Ylli i Kuq. Në Serbi vazhdon që të jetë e madhe mëria ndaj zvicerano-shqiptarit i cili jo vetëm u shënoi serbëve në botërorin e Rusisë golin që u shkaktoi humbjen, por edhe festoi me shqiponjë. Kjo u konsiderua provokim i madh.
Ishte drejtori i përgjithshëm i klubit serb, Zvezdan Terzic, pak ditë më parë u shpreh se mesfushorin me tipare sulmuese e pret një natë e vështirë, duke parë që biletat kanë avulluar. Por në Beograd zotohen se siguria do të jenë në maksimum dhe sfida do të luhet sipas rregullave.
“Unë nuk frikësohem aspak. I kam lexuar ato që janë shkruar, por nuk ia kam frikën askujt.”, u përgjigj Shaqiri shkurt në lidhje me interesimin e medieve për këtë çështje. Por ai nuk e ka të sigurt nëse do të do të jetë në fushë në këtë sfidë speciale. Gjithsesi do të vazhdojë që të bëjë maksimumin, që në fund trajneri Jurgen Klopp ta hedhë në fushë.
“Jam i lumtur për aq sa luaj, kur shoh çfarë lojtarësh nuk ia dalin të futen as në stol. Duhet të punoj fort çdo ditë në stërvitje për ta treguar veten. Kam marrëdhënie të mira me trajnerin dhe gjithë të tjerët”, deklaroi Shaqiri. Ndërkohë që fakti që kundër do të jetë Ylli i kuq i Beogradit është një motivim më shumë për mesfushorin që të stërvitet fort e të mund të jetë në fushë më 6 nëntor.
