Trajneri i Kombëtares Shqiptare, Christian Panucci paralajmëroi para pak kohësh se kombëtares do i bashkohej një sulmues i ri.
“Në muajt në vijim do të jem në kërkim të lojtarëve të rinj. Kam në mendje edhe një sulmues”, tha Panucci në intervistën e fundit të dhënë për mediet.
Por kush është prurja e re e përzgjedhur nga trajneri italian?
Sipas “Panorama Sport” bëhet fjalë për futbollistin e Luzernës në kampionatin zviceran, Shkëlqim Demhasaj.
21-vjeçari ka shënuar këtë sezon shtatë gola në 16 ndeshje që është aktivizuar në Kupë dhe në kampionatin helvet.
Fillimisht Demhasaj mësohet se ka hezituar të pranojë ftesën e përfaqësueses kuqezi, por ka qenë menaxheri i tij që ka biseduar me përfaqësuesit e institucionit të futbollit që më pas e ka bindur.
Shtatëlarti 189 centimetra ka luajtur dy ndeshje me kombëtaren U-21 Të Zvicrës kundër Uellsit dhe Bosnjë Hercegovinës.
Me dakordësinë mes palëve “FSHF” është duke bërë gati dokumentacionin për 21-vjeçarin që të jetë i gatshëm për Panuccin në grumbullimin e radhës me Kombëtaren.
