Mark Antony Samson, 23 vjeç, i akuzuar për vrasjen brutale të 22-vjeçares shqiptare Ilaria Sula në Romë, ka dhënë dëshminë e tij në gjykatë, duke shpjeguar ngjarjet që çuan në krimin tronditës. Ai tha se ishte i vendosur të luftonte për rikthimin e Ilarias, pavarësisht krizës që kishte përjetuar lidhja e tyre. Samson rrëfeu se e kishte njohur Ilarian në vitin 2023 dhe lidhja e tyre kishte nisur më 30 prill të po atij viti.
Sipas dëshmisë së tij, marrëdhënia ishte përkeqësuar pasi Ilaria kishte kërkuar të shihte notat e tij universitare, një kërkesë që e kishte traumatizuar Samsonin për shkak të presionit të madh nga familja për shkollën. Ai tha se ajo i kishte dhënë ultimatum, duke kërcënuar se do ta linte nëse nuk i tregonte notat. Për më tepër, ai theksoi se Ilaria kishte filluar të sillet në mënyrë të paqëndrueshme, duke e trajtuar herë si të dashur, herë si mik.
“Ajo më tha se për të s’do të ishte problem të tregonte notat e saj”, është shprehur ai.
Situata u përkeqësua në mars, kur Ilaria u regjistrua në një platformë takimesh, gjë që e tronditi Samsonin, duke e bërë atë të ndihej i tradhtuar.
Mediat italiane raportojnë se pas ngjarjes tragjike, autori ka vazhduar të tregojë një qëndrim të ftohtë dhe të kontrolluar, duke u munduar të mashtrojë të afërmit dhe shoqërinë e Ilarias, duke dërguar mesazhe dhe duke u shtirur si ajo, për të krijuar përshtypjen se 22-vjeçarja ishte ende gjallë.
