Pas një ‘telenovele’ të gjatë në media dhe disa refuzimesh, qendërmbrojtësi Enea Mihaj mes Greqisë dhe Shqipërisë zgjodhi të përfaqësojë ngjyrat kuqezi. Shtatlarti ditët e fundit ka shkaktuar jehonë të madhe sa i përket merkatos së futbollistëve shqiptarë. Ishin mediat portugeze që konfirmuan se Mihaj po kërkohej me këmbëngulje nga Benfica, e cila kërkon me çdo kusht shërbimet e futbollistit kuqezi.
Por për Mihaj duket se konkurrenca është më e gjerë, pasi është edhe Olimpiakos që dëshiron ta blejë që në janar. Ndërsa interesime janë shprehur thuajse nga gjysma e ekipeve të Serisë A, por më së shumti me idenë për të mbyllur një marrëveshje në fundin e sezonit.
Duke parë gjithë këtë situatë të krijuar, ekipi i Panetolikosit po e menaxhon në mënyrën e tij. Futbollisti shqiptar ka filluar të njoh stolin në takimet e fundit, ndërsa në humbjen 3-0 ndaj OFI nuk u aktivizua për asnjë moment, e më parë kishte luajtur vetëm 6 minuta. Ndërkohë që ky lojtar ishte një titullar i padiskutueshëm më parë në skuadrën e tij.
