Rey Manaj ishte protagonist në fitoren 1-3 që mori një ditë më parë ekipi i tij, Albacete. Sulmuesi i kombëtares shqiptare shënoi golin e parë për skuadrën e tij në minutën e 3’ të takimit, por në fundin e pjesës së parë bën një ndërhyrje mjaft të ashpër ndaj mbrojtësit të Mallorcas dhe ky i fundit detyrohet të largohet nga fusha me ambulancë.
Tifozë shpërthyen menjëherë ndaj tij duke e cilësuar si vrasës dhe një lum kërcënimesh me jetë vërshuan në drejtim të tij. Por ishte mbrojtësi Xisco Campos, ai që ka sqaruar gjithçka me anë të një statusi në “Twitter”. Ai ka falënderuar doktorët për kujdesin ndaj tij, por edhe Manajn, ku siç deklaron, ishte vetë shqiptari që u interesua i pari për të.
“Faleminderit skuadrës, stafit mjekësor, doktorit dhe tifozëve të cilët u kujdesën për mua dhe më inkurajuan. Duhet të them se lojtarët e Albasetes u interesuan për mua, dhe Manaj i pari në veçanti. Diçka që ndodh në futboll, dhe që mbetet në fushën e lojës. Tani mendjen te rikuperimi. Faleminderit.” – shkruan lojtari Sisko në rrjetet sociale.
