Kosova ka miratuar vendosjen e taksës 100% për mallrat e Serbisë dhe ato të Bosnjës. Ky vendim vjen si kundërpërgjigje që Kosova i bën politikës agresive serbe, pas votës kundër anëtarësimit të Kosovës në INTERPOL.
Lajmin e ka bërë të ditur kryeministri i Kosovës, Ramush Haradinaj me anë të një njoftimi në Facebook, ku shkruan se vendimi hyn në fuqi menjëherë, ndërsa përjashtohen brendet ndërkombëtare të listuara në aneks.
Njoftimi i plotë:
Nga sot masë 100% ndaj Serbisë!
Qeveria e Kosovës në mbledhjen e sotme, ka marrë vendim që të vendoset masa prej 100% ndaj produkteve të importuara me origjinë nga Serbia dhe Bosnja e Hercegovina, përjashtuar brendet ndërkombëtare të listuara në aneks. Poashtu, Qeveria e vendit obligon Ministrinë e Tregtisë dhe të Industrisë dhe të gjitha institucionet relevante, që të largojnë dhe të ndalojnë importin dhe hyrjen potenciale në treg të të gjitha produkteve, të cilat nuk i referohen dhe janë në kundërshtim me emërtimin zyrtar dhe kushtetues të Republikës së Kosovës. Vendimi hyn në fuqi menjëherë – institucionet relevante obligohen ta zbatojnë poashtu menjëherë.
