E fejuara e gazetarit të vrarë Jamal Khashoggi, ka refuzuar ftesën e presidentit Trump për të vizituar Shtëpinë e Bardhë.
“Qëndrimet e Trump të bëra në ditët e para rreth ftesës së tij dhe qëndrimet që bëri më pas bien në kundërshtim me njëra-tjetrën. Ato ishin thjesht fjalime për të fituar simpatinë e publikut”, tha Hatice Cengiz gjatë një interviste me kanalin pro-qeverisë turke, Haber Turk.
Cengiz më përpara kishte pranuar të vizitonte Washingtonin, teksa tha javën e fundit se nëse Trump “bën një kontribut të madh dhe përpjekje për zbulimin e asaj çfarë ndodhi në konsullatën Saudite në Stamboll, do të konsideroj ftesën e tij”.
Por, Cengiz tha të premten se do të shkojë në Shtëpinë e Bardhë vetëm nëse administrata nis të hetojë për rastin e Khashoggit.
Khashoggi u zhduk pasi hyri në konsullatën e Arabisë Saudite në Stamboll më 2 tetor, për të marrë disa dokumente që do e lejonin atë të martohej me Cengiz.
Lidhur me vrasjen e tij, ka reaguar presidenti turk Erdogan, i cili ka kërkuar që çështja t’i kalohet autoriteteve turke, meqë “Arabia Saudite nuk po i bën të dyshuarit të flasin”.
Ndërkohë, presidenti i Rusisë Putin është ndër të vetmit që nuk ka kritikuar Arabinë Saudite, teksa u shpreh se preferon të presë rezultatet e investigimit, para se të komentojë mbi ngjarjen./ TIRANA TODAY
