Një ngjarje e rëndë ka ndodhur në Greqi, ku 11 persona kanë vdekur pas një aksidenti. Mësohet se viktimat janë refugjatë, që kishin ardhur nga kufiri me Turqinë. Kamioni ku ata po udhëtonin u përplas në veri të Greqisë.
Policia tha se aksidenti fatal ndodhi pas orës 05:00 të mëngjesit, pranë qytetit të Kavalas. Kamioni udhëtonte në drejtim të Selanikut. Mësohet se shoferi ka humbur kontrollin e mjetit dhe u përplas me një makinë. Kamioni më pas shpërtheu në flakë.
Refugjatët në automjet u dogjën, duke mos patur mundësi të dilnin. I vetmi person që ka shpëtuar është shoferi i mjetit. Ky i fundit po trajtohet në spital për plagët e marra.
Për shkak të djegies së trupave, policia e ka të vështirë të bëjë identifikimin e viktimave. Pritet ekzaminimi i ADN-ve.
Autoritetet greke kanë vënë re një rritje të refugjatëve që kalojnë kufirin turko-grek në mënyrë ilegale në muajt e fundit. Refugjatët drejtohen drejt Selanikut e më pas aplikojnë për azil.
