Prokuroria e Posaçme kundër Korrupsionit dhe Krimit të Organizuar ka paraqitur më 5 dhjetor 2024 kërkesën për verifikimin dhe zbatimin e masës së sigurimit personal ndaj Murat Gjunikut, i dyshuar për kryerjen e një sërë veprash penale, përfshirë kalimin e paligjshëm të kufijve dhe falsifikimin e dokumenteve.
Në seancën e datës 7 dhjetor 2024, Gjykata e Posaçme e Shkallës së Parë për Korrupsionin dhe Krimin e Organizuar, me vendimin Nr. 149, vendosi vazhdimin e masës së sigurimit personal “Arrest në burg” ndaj Gjunikut, i cili është nën hetim për veprat penale të kryera në bashkëpunim si pjesë e një grupi të strukturuar kriminal.
Gjuniku është i dyshuar për pjesëmarrje në një grup kriminal që operonte në fushën e kalimit të paligjshëm të kufijve dhe falsifikimit të dokumenteve. Po ashtu, ai akuzohet për përfshirje në veprime të tjera të kryera nga një organizatë kriminale, duke i shkaktuar dëm shoqërisë dhe rendit publik.
Gjykata e Posaçme ka urdhëruar që Gjuniku të dërgohet menjëherë në një institucion paraburgimi dhe të mbetet atje në dispozicion të organit të procedimit. Vendimi i gjykatës mund të ankimohet brenda pesë ditëve nga njoftimi i tij në Gjykatën e Posaçme të Apelit.
Këtë vendim, Gjykata e Posaçme e mori pas një kërkese të Prokurorisë për të siguruar se hetimet ndaj Gjunikut vazhdojnë pa ndërprerje dhe me zbatimin e masave ligjore të nevojshme.
Njoftimi i plotë:
Prokuroria e Posaçme kundër Korrupsionit dhe Krimit të Organizuar më datë 05.12.2024 ka paraqitur pranë Gjykatës kërkesën me objekt: “Marrjen në pyetje dhe verifikimin e kushteve dhe kritereve të zbatimit të masës së sigurimit personal, e caktuar me vendimin nr. 54, datë 06.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar ndaj personit nën hetim Murat Gjuniku”. 2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Çela, bazuar në nenet 112, 228, 229, 230, 238 dhe 248 të K.Pr.Penale, me vendimin Nr. 149, datë 07.12.2024, vendosi: 1. Vazhdimin e zbatimit të masës së sigurimit personal me karakter shtrëngues “Arrest në burg” e parashikuar nga neni 238 i K.Pr.Penale e caktuar me vendimin Nr. 54, datë 06.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar ndaj personit nën hetim Murat Gjuniku, i dyshuar për kryerjen e veprave penale “Ndihma për kalim të paligjshëm të kufijve”, e kryer në bashkëpunim në formën e grupit të strukturuar kriminal; “Falsifikimi i dokumentave” e kryer në bashkëpunim në formën e grupit të strukturuar kriminal; “Grupi i strukturuar kriminal”; “Kryerja e veprave penale nga organizata kriminale apo grupi kriminal” të parashikuara nga nenet 298/2 – 28/4; 189/2 – 28/4; 333/a dhe 334/1 të Kodit Penal. 2. Urdhërohet Policia Gjyqësore, që personi nën hetim Murat Gjuniku, të dërgohet menjëherë në institucionin e paraburgimit, për të qëndruar aty në dispozicion të organit procedues. 3. Urdhërohet Prokuroria e Posaçme kundër Korrupsionit dhe Krimit të Organizuar, dhe policia gjyqësore për zbatimin e këtij vendimi. 4. Kundër këtij vendimi mund të bëhet ankim në Gjykatën e Posaçme të Apelit Kundër Korrupsionit dhe Krimit të Organizuar brenda 5 ditëve, nga njoftimi i vendimit te gjykatës.
