Juventus është duke zhvilluar një sezon fantastik. Deri më tani ata janë të pamposhtur në Serie A dhe kanë mposhtur të gjithë rivalët direkt për titull. Edhe në Champions League ata kanë siguruar vendin e parë në grup dhe kanë dhuruar paraqitje mjaft të mira. Por duket se drejtuesit janë vënë në lëvizje që tani për merkaton e verës dhe mendojnë përforcimet.
Emri i parë në listën e Fabio Paraticit është Aaron Ramsey, të cilit i skadon kontrata qershorin e ardhshëm. Një transferim, i cili nuk do të ketë asnjë kosto për kartonin e lojtarit, por vetëm komisionet dhe rrogën që do t’i caktohet mesfushorit uellsian. Ramsey është një emër mjaft i lakuar për merkaton, duke qenë se është kërkuar nga disa klube angleze, por dhe Milani në kampionatin italian.
Emri tjetër për mesfushën bardhezi vjen nga Real Madridi dhe është pikërisht, Isco. Lojtari i Realit është një emër i cili ndiqet prej kohësh nga “Zonja e Vjetër” dhe aktualisht nuk po kalon një periudhë të mirë tek ekipi merengues.
Kjo vjen për shkak të mosaktivizimit, që nga ardhja e trajnerit të ri Santiago Solari, i ardhur pas pushimit nga puna të Julen Lopeteguit. Gjithsesi, për Iscon konkurrenca është shumë e lartë nga skuadrat më të mira evropiane, mbi të gjitha Manchester City, ku Pep Guardiola kurrë nuk e ka fshehur admirimin për futbollistin.
Madje, “Citizens” janë të gatshëm për të paguar rreth 80 milionë euro për kartonin e spanjollit, i cili do të shtonte akoma më shumë cilësinë në mesfushë. Megjithatë, interesimi i Juves për Iscon mbetet i lartë dhe bardhezinjtë do të kërkojnë të kryejnë një marrëveshje, njësoj si me Cristiano Ronaldon.
