Këtë mbrëmje, Mziu dhe Gjunkshi me mbështetës të tyre kanë bllokuar tre makina në fshatin Pilafe me pretendimet se kishte dalë për të blerë vota për llogari të Partisë Socialiste.
Edhe në ditën e heshtjes zgjedhore Xhelal Mziu dhe Xhemal Gjunkshi vazhdojnë absurditetin e cënimit të lirisë së qytetarëve në Dibër, duke ndaluar pa asnjë lloj indicie serioze persona të cilët dyshojnë se po blejnë vota për kundërshtarët e tyre politikë.
Policia deri tani ka kontrolluar dy nga tre automjetet e ndaluara nga PD dhe po kontrollon të tretin. Krahas këtij terrori, Gjunkshi ka telefonuar policinë duke pretendetuar se një person ka qëlluar me armë zjarri në ajër pranë tyre, por policia deklaron se nga verifikimet e deritanishme kjo nuk është e vërtetë.
Njoftimi i policisë:
Rreth orës 20.25 shtetasi Xh.Gj., (kanditat për deputet i subjektit politik Partia Demokratike), ka telefonuar në sallën operative të Drejtorisë Vendore të Policisë Dibër, i cili pretendonte se në fshatin Pilafe, njësia Administrative Tomin, kanë ndaluar një shtetas që dyshohej se shpërndante para në këmbim të votave.
Gjithashtu shtetasi Xh.Gj., paraprakisht ka pretenduar se një person teksa është larguar ka qëlluar njëherë me armë zjarri në ajër.
Menjëherë është ngritur grupi hetimor i Drejtorisë Vendore të Policisë Dibër dhe nën drejtimin e Spak dhe të Prokurorisë të Juridiksionit të Përgjithshëm Dibër po kryejnë hetimet për zbardhjen e rastit.
