Klodian Duro e ka nisur me humbje aventurën tek skuadra e Kamzës, pasi janë mposhtur 1-0 nga Kukësi. Ndeshja u zhvillua në “Loro Boriçi”, ku vendosi një gol i shënuar që në pjesën e parë nga kapiteni Shameti. Verilindorët me këtë fitore ruajnë ritmin e kryesuesve, duke qëndruar në vendin e dytë me 10 pikë me Partizanin, një më pak se Skënderbeu i vendit të parë, ndërsa Kamza mban vendin e 6 me po aq pikë. Pavarësisht se Duro rriti presionin ndaj skuadrës në prag ndeshje për të sfiduar ish-skuadrën e tij, taktika nuk funksionoi.
Kukësi e nis mjaft mirë lojën dhe hidhet në sulm, Kamza luan me frikë në minutat e para dhe më e përkushtuar është në repartin mbrojtës. Pas tentativash të njëpasnjëshme, verilindorët kanë kaluar në avantazh falë golit të realizuar nga kapiteni Shameti në minutën e 30’.
shameti gol on Vidnews.
Kamza nuk kishte asgjë për të humbur dhe hidhet e tëra në sulm, duke e përqendruar lojën tek kapiteni, Sebino Plaku. Por si në pjesën e parë edhe në të dytën ata shpërdorojnë shumë raste, ku u mungon vetëm finalizimi. Në pjesën e dytë Kamza bëhet më agresive pas zëvendësimeve të bëra nga trajneri Duro dhe i afrohet shumë golit. Por pavarësisht dominimit dhe tentativave të Kamzës, asgjë nuk ka ndryshuar nga rezultati i vendosur që në minutën e 30’ të takimit, me gol të Shametit, 1-0 në favor të Kukësit.
