Elseid Hysaj dhe Napoli janë thuajse në fund të aventurës. Edhe pse Carlo Ancelotti po mundohet të kalojë këtë situatë në qetësi dhe heshtje, bomba ka plasur dhe tashmë duhet vetëm të “ketë viktima”.
Malcuit ka marrë vendin e shkodranit dhe vështirë që të lirojë më korsinë e djathtë. Në anën tjetër, De Laurentis, që po mendon të shesë Allan te PSG, ka shtyrë diskutimet për rinovim. Hysaj nuk do të kënaqet me 3 milionë eurot që kërkon, ndërsa mund t’i bëhet një lëshim me 2,5 milionë euro, por vetëm nëse një blerës i fortë nuk futet në garë.
Ai blerës quhet Chelsea dhe gjithmonë kanë qenë blutë, pasi është Maurizio Sarri ai që shtyn. Kontakte të vazhdueshme telefonike me lojtarin. Hysaj mund të bashkohet me Higuain te blutë, por nëse për argjentinasin është shtruar qilimi i kuq, për futbollistin kuqezi mund të ketë pasoja. Napoli dëshiron 40 milionë euro për kartonin, ndërsa në Londër e duan në formë huazimi me të drejtë blerje.
Napoli nuk është dakord dhe me këto kushte nuk negocion. Sarri shtyn për një tjetër investim dhe Maria Granovskia ka dyshime për cilësitë e Hysajt, nëse vlen aq para. Në anën tjetër, nëse Hysaj do të vishej blu, atëherë në stol do të përfundonte kapiteni Azpilicueta, duke armiqësuar pjesën më të madhe të dhomave të zhveshjes me trajnerin, që do të vihej nën presion sipas rezultateve.
Hysaj është në sezonin e katërt me Napolin, që e bleu 4,5 milionë euro nga Empoli. Ai fiton 1,8 milionë euro në sezon.
