Botërori është eventi më i madh i futbollit dhe që të ndjekësh kombëtaren në këtë turne, planet duhen bërë kohë më parë. Kështu kishte vepruar edhe avokati meksikan, Gilberto Martinez, kishte organizuar një udhëtim familjarë për të ndjekur disa ndeshje në Rusi. Por jeta është treguar shumë e padrejtë me të dhe bëri që ai këtë udhëtim ta bënte i vetëm, me disa karta identiteti të varura në qafë.
Avokati meksikan Gilberto Martinez, pozon me 4 karta identiteti të varura rreth qafës…Por ai udhëtoi i vetëm drejt Rusisë. Meksikani ëndërronte të shihte Kupën e Botës me familjen e tij. Me bashkëshorten Veronika dhe 2 fëmijët, Diegon 8 vjeç dhe Mian 6 vjeçe. Familja kishte blerë biletat e udhëtimit dhe prenotuar hotelet në Rusi.
Gjithsesi, një tragjedi ndodhi më 28 prill. Veronika dhe fëmijët ndodheshin në Majemi për të vizituar vëllain e saj…kur një fuoristradë u përplas me fugonin që drejtonte Veronika. Të tre gjetën vdekjen e menjëhershme. Gilberto kërkoi ndihmë nga një psikolog, që e bindi të udhëtonte në Rusi, ashtu siç e kishte planifikuar. Gilberto pa ndeshjen e parë të Meksikës kundër Gjermanisë.
Ai kishte me vete të 4 mjetet e identitetit për të hyrë në stadium, në shenjë nderimi ndaj familjes së tij. Pas fitores së kombëtares, Gilbertoi mori një mesazh në celular…Aty shkruhej:“Kjo ishte për familjen tënde!”. Mesazhi ishte dërguar nga portieri i Meksikës, Guilermo Oçoa. Gilberto pa gjithashtu në stadium fitoren e Brazilit ndaj Kosta Rikës…
Ai kishte blerë biletat edhe për këtë ndeshje, pasi djali i tij Diego dëshironte të shihte Nejmarin në fushën e lojës. Diego nuk pati kurrë shansin të shihte heroin e tij teksa luante. Gilberto e pa ndeshjen vetëm. Pavarësisht kësaj tragjedie, Gilberto lejoi që ky aktivitet futbollistik madhor të bëhej pjesë e jetës së tij, pavarësisht momentit të vështirë që po përjeton.
