Në pistën e lagur të Motegi, për shkak të shiut të dendur që binte gjatë ditës së sotme, janë zhvilluar dy sesionet e para të provave të lira në Moto GP, të vlefshme për Çmimin e Madh të Japonisë. Kohën më të shpejtë e dha piloti italian Andrea Dovizioso me Ducati, që ndali kronometrin në kohën 1’54”877. Ai la pas kryesuesin e renditjes botërore Marc Marquez, që më motorin Honda ishte 43 të mijtat më i avashtë, çka tregon se rivaliteti mes tyre do të jetë i hapur deri në fund. Dovizioso e Marquez kanë dhuruar spektakël në pistë, me spanjollin e Honda që ishte edhe protagonist i një rrëzimi. mirë u paraqit edhe Ducati tjetër i Jorge Lorenzo, i katërti, ndërsa Dani Pedrosa me motorin tjetër Honda u klasifikua në vendin e tetë.
Ata që zhgënjyen sot në pistën e lagur të Motegi ishin dy pilotët e Yamaha, me Maverick Vinales u rendit në vendin e 11-të, duke lënë pas shokun e tij të skuadrës Valentino Rossi. Ata ishin 1,5 sekonda më të avashtë se Dovizioso, duke konfitmuar se Yamaha ka vështirësi në pistën e lagur. Duket se në pistën e lagur u përshtatën më mirë motori Ducati dhe Aprilia, që ishin më të shpejtë. Por kushtet e motit mund të ndikojnë edhe nesër në provat zyrtare (ora 07:35), ndërsa gara do të zhvillohen të dielën, ora 07:00. Dovizioso e Marquez do të zhvillojnë një betejë të fortë në këtë pistë, duke qenë pretendentët kryesorë për titull në Moto GP.
