Pas ditësh tensioni dhe një sulmi të papritur iranian mbi një bazë ajrore amerikane në Katar, Presidenti i SHBA-së, Donald Trump, ka reaguar me tone të moderuara, duke falënderuar publikisht Iranin për “njoftimin e hershëm” dhe duke bërë thirrje për paqe në rajon.
Në një sërë postimesh në platformën Truth Social, Trump tha se “asnjë amerikan nuk u lëndua” dhe e cilësoi përgjigjen iraniane si të “dobët dhe të parashikueshme”, e cila “u kundërshtua me sukses nga sistemet amerikane të mbrojtjes ajrore”.
Presidenti amerikan vlerësoi faktin që Iranit i kishte paraprirë sulmit me një paralajmërim, duke thënë se kjo kishte ndihmuar në shmangien e viktimave:
“Dua ta falënderoj Iranin që na dha njoftim të hershëm, gjë që bëri të mundur që të mos humbiste asnjë jetë dhe të mos lëndohej askush,” – shkroi Trump.
Ai gjithashtu shprehu dëshirën që Teherani të vijojë drejt “Paqes dhe Harmonisë në Rajon”, dhe shtoi se do ta inkurajonte me entuziazëm Izraelin të ndjekë të njëjtën rrugë.
Në një tjetër postim, Trump u shpreh optimist për situatën globale:
“URIME BOTË, ËSHTË KOHA PËR PAQE!”
Sipas deklaratave zyrtare të Pentagonit dhe vetë Presidentit Trump, 14 raketa iraniane u lëshuan drejt bazës amerikane në Katar, prej të cilave 13 u rrëzuan, ndërsa një tjetër u drejtua në një zonë jo kërcënuese. Sipas autoriteteve amerikane, “pothuajse asnjë dëm nuk është shkaktuar”.
Pas ngjarjes, Ambasada Amerikane në Katar hoqi urdhrin e izolimit që ishte vendosur më herët dhe njoftoi se do të rifillojë funksionimin normal duke nisur nga nesër.
Në postimin e tij të tretë, Trump falënderoi Emirin e Katarit për rolin e tij në përpjekjet diplomatike për ruajtjen e stabilitetit në rajon.
